الصقــــــر لو ينجـرح يبقـى صقـر !!!؟

يا معاذ اسمع كلامـي واستجيـب
واحفظه يا بوك شطرن مع شطـر
ــــــــــ
لا يضيع الوقت يالحـر النجيـب
انتبـــــه لـه لا يجـي كلـه هـدر
ــــــــــ
وانتبه للدين مـن قبـل المشيـب
العمر يركض علـى متنـه قبـر
ــــــــــ
انتبـه يابـوك واحـذر لا تغيـب
عن حياتك في سفـر وألا حضـر
ــــــــــ
الصلاه اللي بهـا الدنيـا تطيـب
والحيـاة بدونهـا ضيقـة صـدر
ــــــــــ
من غفل عنها ترى ماله نصيـب
بالسعادة لو سكن بأجمـل قصـر
ــــــــــ
ولو ظهر لك بالبلد شكلـه مهيـب
لا يهمك من حقـــــاره فـي حقـر
ــــــــــ
ومن تهاون في طهارتها عطيـب
تعرفـه مـن بينهــــــم وجهـه ودر
ــــــــــ
ومن تخلف عن جماعتهـا كئيـب
وماربح من كـان ينقـــرهـا نقـر
ــــــــــ
هي تجارة من إلـى ربـه منيـب
وفي ظلام الهم هـي نـور البـدر
ــــــــــ
وباقي الاركان هي نبـع القليـب
وهي اساس الدين ما منها عـذر
ــــــــــ
وللحقوق اخضع ولو راسك صليب
لا تجي من دونها عجـز وصـدر
ــــــــــ
ولا تزعزع لأصبح الموقف صعيب
الصقــــــر لو ينجـرح يبقـى صقـر
ــــــــــ
والنسب خله مثل ماهـو عريـب
انت من ناسن لهـم عــــز وقـدر
ــــــــــ
الخوال اعزاز واعمامـك لهيـب
بالمراجل بيـن بـدوان وحضـر
ــــــــــ
وبالكرم خلك مثـل حاتـم رهيـب
لا نصوك اللي لهم عنـدك وقـر
ــــــــــ
قم بواجبهم تـرى مثلـك لبيـب
يفهم المعنى بـلا شـرح وهـذر
ــــــــــ
والردي لو كان لك اقـرب قريـب
لا تحطـه يالسنافـي لــــــك ذخـر
ــــــــــ
يرتخي لحتجت في الوقت العصيب
فزعتــــــــه والخاتمــه يطلع بـزر
ــــــــــ
وكل حاجه تندرج تحـت المعيـب
قــــــدرهـا مهمـا تعاظمهـا حــدر
ــــــــــ
والأدب خلك مـع الجاهـل اديـب
ومع جميع الناس فضـلا لا أمـر
ــــــــــ
قمة الأخـلاق والصـدر الرحيـب
خلها ديدنــــك مـع عـزم وصبـر
ــــــــــ
والأمـل بالله تكفى لا يخـيـب
لو لعقت الأرض من جوع وفقـر